टानको ४६औं साधारण सभा: यस्ता छन् टान अध्यक्षका उम्मेद्वार पाण्डेले अघि सारेका मुख्य तीन एजेण्डा

काठमाडौं, २१ साउन । आउँदो सेक्टेम्बर २ तारिकमा ट्रेकिङ एजेन्सीज एसोसियन अफ नेपाल (टान) को ४६औं साधारण सभा हुँदैछ ।
टानको नयाँ नेतृत्वको अध्यक्ष पदका लागि लामो सयम पर्यटन क्षेत्रमा अनुभव भएका, ट्रेकिङ एजेन्सीज व्यवसाय  एवं टानको महासचिव जस्तो गरिमामय जिम्मेवारीमा समेत रहेर काम गरेका सागर पाण्डेले टानको नयाँ नेतृत्वको लागि अध्यक्ष पदका लागि उमेदवारी घोषणा घोषणा गर्दै प्रमुख तीन एजेण्डा अघि सारेका छन् ।
उमेदवार पाण्डेले पहिलो चरणमा तीनवटा एजेण्डा अघि सारेका छन् । उनले व्यवसायी तथा मजदुरका विषयलाई लिएर राहत तथा उद्धार अक्षयकोषको स्थापना गर्ने, कानूनी परामर्श इकाईको गठन गर्ने र बैंकिङ तथा भ्याट र ट्याक्स परामर्श इकाई गठनको कार्ययोजना अघि सारेका छन् । उनले आफ्ना तीन बुँदे कार्ययोजनामा सबै कर्मचारी तथा मजदुर साथीहरुका लागि राहत तथा उद्धार अक्षय कोषको स्थापना गर्ने घोषणा गरेका छन् ।

पाण्डेले टान सदस्य कम्पनीको कर्मचारी, ट्रेकिङ गाइड वा मजदुर जुनसुकै वेला घाइते हुने, वा मृत्युसम्म हुने अवस्था आइपर्ने उल्लेख गर्दै त्यस्तो समस्यामा सहयोग गर्नुपर्छ भन्ने मान्यतालाई स्थापित र व्यवहारिक बनाउन राहत प्रदान गर्नेगरी अक्षयकोष स्थापना गर्नु व्यवसायिक हकहितको लागि महत्वपूर्ण भएको बताए । त्यसैगरी उनले व्यवसायीहरुलाई कुनै पनि बेला दिर्घकालीन रोग वा महंगो उपचार गर्नुपर्ने रोगहरु लागेको अबस्थामा पनि अक्षय कोषले राहत दिने बताएका छन् ।

यस्तै पाण्डेले टानमा एउटा अलगै विभागका रुपमा कानूनी परामर्श इकाइको आवश्यकता महसुस गरी कानूनी परामर्श इकाईको गठन गर्ने प्रतिबद्धता अघि सारेका छन् । यसबाट टानका साधारण सदस्यहरुले आफ्नो व्यवसाय सञ्चालनको क्रममा आइपर्ने कानूनी अड्चन, प्रशासननिक अप्ठ्यारा र कठिनाईहरु तथा अन्य कुनै किसिमको कानूनी परामर्श लिन पाउने उल्लेख छ । कानुनी समस्यालाई टानले सहजीकरण गरी समस्या समाधानका लागि पहल गर्ने उनले बताएका छन् । ।
यसैगरी बैंकिङ तथा भ्याट र ट््याक्स परामर्श समितिको आवश्यकता पुरा गर्नेगरी बैंकिङ तथा भ्याट र ट्याक्स परामर्श इकाई गठनको अबधारण पनि उनले पहिलो चरणको आफ्नो योजनामा अघि सारेका छन् ।
टानको अध्यक्ष पदको उमेदवार पाण्डेले आसन्न अधिवेशनमा अघि सारेका योजनाहरु यस्ता छन्ः

विगतमा लामो समय टानको कार्यसमितिमा रहेर काम गर्नुका साथै महासचिव जस्तो महत्वपूर्ण जिम्मेवारीमा समेत रहेर मैले काम गरिसकेको यहाँहरुलाई अबगत नै छ । यहाँहरुकै अनुरोध सुझाव र सल्लाहकै आधारमा यसपटक टानको नेतृत्वका लागि अध्यक्ष पदमा मैले उमेद्वारी दिने निर्णय गरेको छु । त्यसो त भाषण र कुरा भन्दा पनि काम नै गर्नुपर्छ भन्ने मेरो मान्यता छ ।टानको नेतृत्वका लागि अध्यक्ष पदमा उमेद्वारी दिँदै गर्दा मैले टानमा गएर तत्काल गर्नुपर्ने पहिलो चरणका तीनवटा एजेण्डाहरु अघि सारेको छ।

१) राहत तथा उद्धार अक्षयकोषको स्थापना:
सबैभन्दा पहिले सबै कर्मचारी तथा मजदुर साथीहरुका लागि राहत तथा उद्धार अक्षय कोषको स्थापना गर्ने छु । कुनै पनि सदस्य कम्पनीको कर्मचारी, ट्रेकिङ गाइड वा मजदुर जुनसुकै वेला जुनसुकै समस्यामा पर्दा उसलाई सहयोग गर्नुपर्छ भन्ने मान्यतालाई स्थापीत र व्यबहारिक बनाउन राहत प्रदान गर्नेगरी अक्षयकोष स्थापना गर्नु महत्वपूर्ण ठानेको छु । त्यसका अतिरिक्त टानका सदस्य व्यवसायीहरुलाई कुनै पनि बेला दिर्घकालीन रोग वा महंगो उपचार गर्नुपर्ने रोगहरु लागेको अवस्थामा सोही कोषबाट राहत उपलव्ध गराइने यस कोषको लक्ष रहेको छ ।

कतिपय व्यबसायीहरु महंगो उपचार गर्नुपर्ने रोग लागेको अबस्थामा अहिले पनि उपचारबाट बंचित हुनुपर्ने अबस्था छ । त्यसो हुन नदिनका लागि यस कोषले व्यबसायीलाई सहयोग गर्ने छ । मुलत व्यबसायी र कर्मचारी दुवै पक्षलाई फरक ढंगको राहतका राहत तथा उद्धार अक्षयकोषको स्थापना गर्ने लक्ष्य लिएको छु । एकवर्षभित्र कम्तिमा एक करोड बराबरको अक्षय कोषको व्यवस्थापन गरिने छ । यसको सुरुवाति एककरोड बजेट घोषणा गर्दछु । त्यसबारेमा अवधारणा बनाएर अघि बढ्ने कुरा यहाँ उल्लेख गर्न चाहन्छु ।
किन आवश्यक छ अक्षय कोष ?
टानमा आबद्ध सदस्य कम्पनीहरुमा कार्यरत पथ प्रदर्शक, अन्य सहयोगीहरु वा कुनै पनि कर्मचारी कुनै पनि समयमा समस्यामा पर्न सक्छ । प्राकृतिक रुपमा पदयात्राको क्रममा घाइते, बिरामी वा मृत्यु भएमा टानले त्यस्तो अबस्थामा राहत प्रदान गर्न जरुरी छ । जति वेला टानको समन्वयनमा अक्षय कोषले राहत प्रदान गर्ने छ ।
यसरी समन्वय गर्दा टान, सम्बन्धित ट्रेकिङ कम्पनी र पीडित पक्षबीचको समझदारी अनुरुपको क्षतिपूर्ति रकम पीडित पक्षलाई दिने व्यवस्था मिलाइनेछ । यस्तो सहमति गर्दा कानूनी सल्लाहकार टानबाट नै राख्ने व्यवस्था गरिने छ । तर टानका साधारण सदस्यहरुले पदयात्रमा काम गर्ने सम्पूर्ण कर्मचारीहरुको नेपाल सरकार श्रम ऐनले तोके बमोजिमको बीमा भने गरेको हुनुपर्नेछ । कोषको स्थापना सञ्चालन र वितरण विस्तृत कार्य विधिमा ल्याइनेछ । त्यसैगरी व्यवसायीको हकमा महंगो उपचार गर्नुपर्ने रोगहरु लागेको अबस्थामा र दिर्घकालीन रोगहरु लागेको अवस्थामा ती सदस्य व्यवसायीलाई उपचारका लागि राहत उपलव्ध गराउने पनि यस कोषको लक्ष रहेको छ ।

२)कानूनी परामर्श इकाईको गठन:
टानमा एउटा अलग्यै विभागका रुपमा कानूनी परामर्श इकाइको आबश्यकता महसुस गरि कानूनी परामर्श इकाईको गठन गर्ने प्रतिबद्धता अघि सारेको छु । यसबाट टानका साधारण सदस्यहरुले आफ्नो व्यवसाय सञ्चालनको क्रममा आइपर्ने कानूनी अड्चन, प्रशासननिक अप्ठ्याराहरु तथा अन्य कुनै किसिमको कानूनी परामर्श लिन पाउनेछन् । समस्या हेरि टानले नै सहजीकरणसँगै समस्या समाधानका लागि पहल गर्नेछ ।
यस्तो व्यवस्थाले नयाँ वा भर्खर–भर्खर व्यवसाय सञ्चालन गरेका युवा तथा मेहनती उद्यमीहरुलाई विशेष सहयोग पुग्नेछ भने अरुलाई पनि सहजिकरण हुने छ । व्यवसाय गर्दा कतिपय कानूनी कुराहरुको ज्ञान नहुन सक्छ जसका लागि कुनै पनि कार्यमा कानूनी परामर्श जरुरी हुन्छ । कानूनी रुपमा कुनै पनि अफ्ठ्यारो अवस्था सृजना नहोस् भनेर यस्तो कानूनी इकाई गठन गरी समन्वयन तथा सहजीकरण गर्नुका साथै आवश्यक परामर्श उपलव्ध गराउन कानूनी परामर्श इकाई गठन गरिने छ ।

३) बैंकिङ तथा भ्याट र ट्याक्स परामर्श इकाई:
यसैगरी बैंकिङ तथा भ्याट र ट्याक्स परामर्श समितिको आवश्यकता पुरा गर्नेगरी बैंकिङ तथा भ्याट र ट्याक्स परामर्श इकाई गठनको अबधारण पनि मैले अघि सारेको छु । प्रत्येक आर्थिक वर्षको अन्त्यमा ट्याक्सरभ्याटको सीमा तथा नियमहरुमा फेरबदल भइरहने हुनाले कतिपय व्यवसायीहरु अलमलमा पर्ने तथा समस्यामा पर्ने गरेका छन् ।
त्यसका साथै बैंकिङ क्षेत्रसँग जोडिएको कर्जा, व्याज तथा अन्य परामर्शमा पनि यस समितिले सहयोग गर्ने छ । यस इकाई समितिले भ्याट, ट्याक्स तथा बैंकिङ क्षेत्रका बारे जानकारी गराउने, परामर्श दिने तथा आवश्यक प्रकृया पुरा गर्नमा सहजिकरण गर्ने र सम्बन्धित समस्या समाधानमा सहयोग गर्ने छ । यसबाहेक अन्य मेरा एजेण्डाहरु विस्तृत रुपमा केहीदिनमा यहाँहरु समक्ष ल्याउने छ ।