६० किलो सुन तस्करीमा आरोपित १० जना अझै सीआईबीको हिरासतमा

काठमाडौं, २१ जेष्ठ । हङकङबाट तस्करी गरेर काठमाडौँ ल्याएको ६० किलो ७ सय ग्राम सुन तस्करीमा संलग्न आरोपमा सीआईबीले १० जनालाई पक्राउ गरेको छ । दोस्रो चरणको अनुसन्धानको क्रममा काभ्रेको तेमाल गाउँपालिका–४ घर भएका ४५ वर्षीय कान्छामान लामा ‘थर्कमान’ सहित १० जनालाई सीआईबीले पक्राउ गरेर अनुसन्धान गरिरहेको छ ।

पक्राउ पर्नेमा वीरगन्ज महानगरपालिका–११ घर भएका ५२ वर्षीय सुरेन्द्रमान श्रेष्ठ, भारत घर भएर ललितपुर बस्ने २२ वर्षीय प्रशान्त गणेश बजवलकर, भारत महाराष्ट्र घर भएर न्यूरोड बस्ने सिद्धनाथ अशोक गायकवाड ‘सिद्धार्थ’ र भारत घर भएर न्यूरोड बस्ने धिरज निदेश बैटे ‘दिनेश’ छन् ।

धादिङको सिद्धलेक गाउँपालिका घर भएका प्रेमनाथ सेडाईं, भक्तपुर सुर्यविनायक घर भएका राजु खत्री, काभ्रे तेमाल–४ का ४५ वर्षीय कान्छा लामा, तिब्बत घर भएर बौद्ध बस्ने गंगा टासी र उदयपुरको त्रियुगा घर भएकी उषा खत्री निरौला पनि छन् ।

गोरखा बारपाक सुलिकोट गाउँपालिका–५ घर भएका १८ वर्षीय सायरी विकलाई पनि सीआईबीले पक्राउ गरेको छ । तस्करीमा संलग्नहरूलाई करिब १ महिनादेखि थुनामा राखेर अनुसन्धान भइरहेको सीआईबीका एक जना अधिकृतले बताए ।

आरोपीहरुविरुद्ध प्रहरीले भन्सार चोरी पैठारी तथा संगठित अपराध मुद्दा चलाएको छ । पहिलो चरणमा चिनियाँ नागरिकहरू याओ पुचेङ्ग, लि वेन सुङ्ग, ली नेङकाई, डीङ सेग्फा, जीक्वाङ लिन, टीयान मि र वेन तोङ सहित २६ जना पक्राउ परेका थिए ।

टीयान मि र वेन तोङ ठमेल स्थित केटीबी रेस्टुरेन्टका सञ्चालक हुन् । पहिलो चरणमा पक्राउ परेका तिब्बत मूलका भारतीय नागरिक ५३ वर्षीय थाप्तेन छिरिङसँग र बेल्जियन नागरिक दावा छिरिङ सहितका अभियुक्तहरू पुर्पक्षका लागी थुनामा छन् ।

सुन तस्करी जाँचबुझ आयोगको सिफारिसको आधारमा सीआईबीले ६० केजी र भेप प्रकरणमा पनि दोस्रो चरणको अनुसन्धान गरिरहेको छ ।