कांग्रेसले आजको प्रतिनिधिसभा बैठक पनि अवरोध जारी राख्ने

काठमाडौं, ३ जेष्ठ । नेपाली कांग्रेसले आजको को प्रतिनिधिसभा बैठक पनि अवरोध गर्ने भएको छ ।

सरकार उपप्रधानमन्त्री तथा गृहमन्त्री रवि लामिछाने विरुद्ध सहकारी ठगी प्रकरणमा छानबिन संसदीय समिति गठन गर्न सरकारा तयार नभएको भन्दै कांग्रेसले प्रतिनिधि सभाको बैठक अवरोध जारी राख्ने बताएको हो ।

बिहीबार बसेको कांग्रेस नेताको बैठकपछि प्रवक्ता डा। प्रकाशशरण महतले सरकारले सहकारी ठगीको मूल समस्या छाडेर घटनालाई अन्यत्र मोड्ने हिसाबले मात्र समिति गठन गर्न खोजेको आरोप लगाए ।

‘रविजी लगायत सहकारीका सबै विषयलाई समेटेर छानबिन हुनुपर्छ भन्ने माग हो । त्यसका लागि सत्तापक्ष तयार भएको छैन । छानबिनको कुरा गर्दा सहकारीको कहाँ के समस्या छ हेर्ने, त्यस्तो छानबिन गर्ने भन्ने कुरा गरेर मूल विषयलाई डाइल्युट गर्ने कुरा आएकाले सहमति हुन सकेको छैन’, डा.महतले भने ।

मुख्य विषय ओझेलमा पारेर हुने छानबिन आफूहरुलाई स्वीकार्य नहुने उनले बताए । बिहीबार प्रतिनिधिसभाको बैठक अपरान्ह ४ बजे बोलाइएको छ । प्रतिनिधिसभा बैठकअघि बैठकमा कसरी प्रस्तुत हुने भन्ने विषयमा कांग्रेसका शीर्ष नेताबीच छलफल भएको थियो ।

छलफलमा उपसभापति धनराज गुरुङ, महामन्त्री गगन थापा र विश्वप्रकाश शर्मा, राष्ट्रियसभा संसदीय दलका नेता कृष्णप्रसाद सिटौला, सहमहामन्त्री जीवन परियार, प्रवक्ता प्रकाशशरण महत, संसदीय दलका प्रमुख सचेतक रमेश लेखकलगायत सहभागी थिए । यसले गर्दा आज पनि ससदको गतिरोध अन्त्य नहुने भएको छ । सरकार पक्ष र प्रतिपक्षबिभ मुडभेडको अवस्था आउने भएको छ ।