कृष्णभीरमा सांसद अब्दुल खान सवार गाडी दुर्घटना

काठमाडौं, २६ चैत । धादिङको कृष्णभीरमा पूर्व खानेपानी मन्त्री एवं सांसद अब्दुल खान सवार गाडी दुर्घटनामा परेको छ।

सोमबार बिहान साढे ८ बजे काठमाडौंबाट बर्दिया जाँदै गरेको कार बेनीघाट रोराङ गाउँपालिका वडा नम्बर ७ कृष्णभिरमा दुर्घटना भएको जिल्ला प्रहरी कार्यालयका प्रहरी निरीक्षक अभय लामाले जानकारी दिए।

बिएसी २७३५ नम्बरको सरकारी कार अनियन्त्रित भई सडक छेउमा ठोक्किँदा चार जना घाइते भएका हुन्।

खानको दाहिने हातमा चोट लागेको छ। उनीसँगै कारमा सवार अली उलाह मुसलमान, अनमर खान र चालक आली मनसुरीलाई पनि चोट लागेको छ।

उनीहरूलाई उपचारको लागि मलेखु अस्पताल पठाइएको थियो।

त्यहाँबाट थप उपचारको लागि काठमाडौं रिफर गरिएको प्रहरी निरीक्षक लामाले बताए।