आर्थिक सवलीकरण नै महिला सशक्तिकरणको मुख्य आधारः प्रधानमन्त्री दाहाल

काठमाडौं, १६ चैत ।  प्रधानमन्त्री पुष्पकमल दाहाल ‘प्रचण्ड’ले महिला सशक्तिकरणको सबैभन्दा प्रमुख आधार आर्थिक सवलीकरण भएको बताएका छन्।

महिला उद्यमी महासङ्घद्वारा आयोजित सातौँ अन्तर्राष्ट्रिय महिला व्यापार मेलाको शुक्रबार बिहान ललितपुरमा उद्घाटन गर्दै प्रधानमन्त्री प्रचण्डले उक्त कुरा बताए ।

‘महिलाको यति नै प्रगतिमा सन्तुष्ट हुन भने सकिन्नँ। त्यसैले उनीहरूको सशक्तिकरणका लागि सबैको हातेमालो आवश्यक छ। त्यसका लागि सबैभन्दा पहिले आर्थिक पहुँच दरिलो हुनैपर्छ,’ उनले भने। आर्थिक पक्ष बलियो भएको खण्डमा महिलाहरु सशक्तिकरणमा टेवा पुग्छ । हरेक क्षेत्रमा महिलाको पहुँच हुनुपर्छ, वास्तवमा भन्ने हो भने अब उद्योगधन्दा लगायत आर्थिक पक्षसँग जोडिएको क्षेत्रहरुमा महिला अगाडि आउनु आजको अपरिहार्र्य आवश्यकता भएको छ । अनिमात्र घर परिवार, समाज, देश र स्वयं महिला पनि शिखरमा पुग्न सक्छिन् ।
सशक्तिकरणको सवाल आजको दुनियाँमा शक्तिसँग जोडिएकोमा प्रधानमन्त्रीले जोड दिए।

सो अवसरमा प्रधानमन्त्रीले महिलाहरूद्वारा सञ्चालित उद्योग र व्यवसायहरूमा करछूट र सहुलियतका कार्यक्रमहरू सञ्चालन गरिएको जानकारी दिँदै भविष्यमा त्यसलाई बढाउँदै लगिने बताए।

‘महिला उद्यमशीलता विकासको माध्यमबाट नेपाली महिलाको सामाजिक तथा आर्थिक सशक्तीकरण गरी राष्ट्र निर्माणमा सहयोग गर्ने परिकल्पनालाई सार्थक तुल्याउन महिला उद्यमी कोष स्थापना गर्ने कुरा महत्वपूर्ण छ। सरकारले महिला उद्यमीको नेतृत्वमा सञ्चालन भइरहेका उद्योगहरूलाई प्रबद्र्धन गर्न कर छूटदेखि अन्य सहुलियतपूर्ण प्रबन्धहरू गरेको छ, आगामी दिनमा त्यसलाई बढाउँदै लगिने छ,’ उनले भने।