राप्रपाले राजसंस्था र हिन्दु राष्ट्र पुनर्स्थापनालगायत आन्दोलनका मस्यौदा पारित गर्यो
काठमाडौं, २१ मंसिर । राजसंस्था र हिन्दु राष्ट्र पुनर्स्थापना लगायतका एजेन्डासहित आन्दोलन गर्न तयार पारेको मस्यौदा राष्ट्रिय प्रजातन्त्र पार्टी (राप्रपा) ले पारित गरेको छ।
बिहीबार बसेको केन्द्रीय कार्यसम्पादन समिति बैठकले मस्यौदा समितिको प्रस्तावलाई परिमार्जन गर्दै पारित गरेको हो।
प्रवक्ता मोहन श्रेष्ठले राप्रपाले राजसंस्था, हिन्दुराष्ट्रको पुनस्स्थापना, संघीयता खारेजी र सुशासन तथा जनजीविकाका पक्षमा आन्दोलन गर्न गठित मस्यौदा समितिको प्रस्तावलाई परिमार्जनसहित पारित गरेको बताए।
मस्यौदा समितिले तयार पारेको प्रस्तावलाई केन्द्रीय कार्यसमितिको बैठकमा पेश गर्ने निर्णय पनि भएको छ। राप्रपाले पुस १ गतेदेखि ३ गतेसम्म काठमाडौंमा केन्द्रीय समिति बैठक गर्ने तयारी गरेको छ।
देश राजनीतिक, सामाजिक, आर्थिक रुपले संकटपूर्ण अवस्थामा रहेको, देशको नेतृत्व र शासन व्यवस्था असफल भइसकेको र यथास्थितिमा देशअघि बढिरहन नसक्ने निश्कर्ष निकाल्दै राप्रपाले आन्दोलनको अपरिहार्यतामा जोड दिएको प्रवक्ता श्रेष्ठ बताउँछन्।
पुस २७ गते पृथ्वी जयन्ती केन्द्रीय तहमा र सबै तहमा उत्सवको रुपमा मनाउने निर्णय पनि राप्रपाले गरेको छ।
‘राष्ट्रिय सभाको निर्वाचनमा सहभागी हुने, यसबारे अन्य दलसँग आवश्यक सहयोग जुटाउन, संवाद गर्न राजनीतिक विभाग प्रमुख बुद्धिमान तामाङलाई जिम्मेवारी दिइएको छ,’ राप्रपाले जारी गरेको विज्ञप्तिमा भनिएको छ।
साथै इलाममा हुने प्रतिनिधिसभाको उपनिर्वाचनमा पार्टीको तर्फबाट आवश्यक तयारी, समन्वय र सहजीकरण गर्न उपाध्यक्ष हेमजङ्ग गुरुङलाई जिम्मेवारी दिइएको राप्रपाले जनाएको छ।
केन्द्रीय कार्यसम्पादन समिति बैठकले राप्रपा नियमावली(२०८० लाई संशोधनसहित पारित गरेको छ।
प्रतिक्रिया दिनुहोस्