एमाले सुदूरपश्चिम अध्यक्षका लागि चार जनाको उम्मेदवारी
धनगढी । नेकपा एमाले सुदूरपश्चिम प्रदेश अधिवेशनको उम्मेदवारी दर्ता समय तेस्रो पटक थप गरिएको छ ।
आज (मंगलबार) उम्मेदवारी दर्ताको लागि बिहान १०ः३० बजे सम्मको समय निर्धारण गरिएको थियो । त्यसपछि ११ः३० र अहिले १२ः३० सम्म समय थप गरिएको छ ।
हाल नयाँ नेतृत्वका लागि मनोनयन दर्ता भइरहेको छ । एमाले सुदूरपश्चिम प्रदेश अध्यक्षमा चार जनाको उम्मेदवारी परेको छ । निर्वाचन कमिटिका प्रमुख निर्वाचन अधिकृत पदम पालका अनुसार हालसम्म अध्यक्षमा चार जनाले उम्मेदवारी दर्ता गराएको हो ।
निवर्तमान प्रदेश कमिटी उपाध्यक्ष कमल तिमिल्सिना, अछामका पूर्व जिविस सभापति एवम् प्रदेश सचिवालय सदस्य कृष्णप्रसाद जैशी, संविधानसभा सदस्य तथा अछामकै पूर्व अध्यक्ष भरत साउँद र प्रदेश सचिवालय सदस्य वचनबहादुर सिंहले उम्मेदवारी दर्ता गराएका छन् ।
नयाँ नेतृत्व चयन गर्न सोमबार बन्द सत्र नै रोकेर सहमतीको प्रयास गरिएको थियो । तर सहमती सम्भव नभएपछि साँझ ५ बजे मतदान हुने निर्वाचन कमिटीले जनाएको छ ।
प्रतिक्रिया दिनुहोस्