चाडपर्व नजिकिएसँगै बजार अनुगमनलाई तिव्रता

काठमाडौं, असोज १८ । चाडपर्व नजिकिएसँगै बजार अनुगमनलाई तिव्रता दिन थालिएको छ । जिल्ला अनुगमन टोलीले लमजुङका विभिन्न पसलमा दिनहुँजसो अनुगमन थालेको हो ।

अनुगमनको क्रममा मंगलबार बेसीशहर बजारका १२ वटा पसलहरू अनुगमन गरेको थियो । बेँसीसहर ७ पुरानो बैक चोक देखि भिमसेन स्थान सम्मका यटीका पसलमध्य ५ वटा स्टोर्स, २ वटा फ्रेस हाउस, २ वटा किराना एण्ड तरकारी पसल, १ वटा किराना पसल, १ वटा वर्डस, १ वटा मसला उद्योग अनुगमन गरिएको थियो । अधिकांश पसल मापदण्डविपरीत भेटिएको छ।

अनुगमन क्रममा दर्ता विना सञ्चालन भएका, म्याद गुज्रेका खाद्य सामाग्री र लेभलिङ नम्वर मेटिएको, इजाजत पत्र नलिई बिक्री वितरण गरिएको ४ वटा किराना तथा फलफूल पसल, मासु पसल र किराना पसललाई कारवाही स्वरुप जरिवाना गरिएको पर्यटन तथा उद्योग कार्यालयका प्रमुख मिताकुमारी थापाले बताइन्। उनका अनुसार ४ वटा पसलबाट ११ हजार रुपैयाँ जरिवाना गरिएको छ ।

अनुगमनमा अधिकांश पसलहरूमा मूल्यसुची नराखेको पाइएकाले मूल्यसूची राख्न निर्देशन दिइएको प्रमुख थापाले बताइन्। उपभोग्य मिति भएको मात्र खाद्य सामाग्री विक्री वितरण गर्न तथा मुल्य सुची अपडेट गर्न सुझाव दिइएको छ । यस्तै लेभलिङ भएका खाद्य सामाग्री मात्र बिक्री वितरण गर्न, दर्ता विना सञ्चालन नगर्न, व्यवस्थित रुपमा खाद्य र अखाद्य समाग्रीहरु छुट्छुटै राख्न, म्याद गुज्रेका खाद्य सामाग्री बिक्री वितरण नगर्ना, ईजाजतपत्र लिएर मात्र सुर्तिजन्य पदार्थ र चुरोट बिक्री वितरण गर्न, सरसफाइमा ध्यान दिन, दर्ता प्रमाणपत्र र व्यवसायको पूजी मिलाउन सुझाव दिइएको छ ।

उक्त अनुगमनमा पर्यटन तथा उद्योग कार्यालयका प्रमुख मिताकुमारी थापाको नेतृत्वमा अनुगमन गरिएको हो । जिल्ला अनुगमन टोलीले असोज महिनामा मात्रै ४ पटक ५४ वटा पसलको अनुगमन गरेको थियो भने साउन महिनामा २ पटक बजार अनुगमन गरिसकेको छ ।