आज संविधान दिवस धुमधामकासाथ मनाईंदै
काठमाडौं, ३ असोज । संविधान दिवस, २०८० आज देशभर विभिन्न कार्यक्रम गरी मनाइँदैछ। २०६४ र २०७० सालको संविधानसभाको लामो संघर्ष र अथक प्रयासपछि नेपालको संविधान २०७२ जारी भएको हो ।
देशभरका सरकारी तथा निजी कार्यालय, विदेशस्थित कूटनीतिक नियोग, राजनीतिक दल, नागरिक समाज, सङ्घसंस्थालगायतले विभिन्न कार्यक्रम गरी संविधान दिवस मनाउँदैछन्।
आज बिहान टुँडिखेलमा आयोजना हुने संविधान दिवससम्बन्धी विधि कार्यक्रममा राष्ट्रपति रामचन्द्र पौडेल सहभागी हुनेछन्।
संघीय लोकतान्त्रिक गणतन्त्र नेपालका प्रथम राष्ट्रपति रामवरण यादवले २०७२ असोज ३ गते ‘नेपालको संविधान २०७२’ जारी भएको घोषणा गरेका थिए।
संविधान निर्माण भएर कार्यान्वयनमा आएको आठ वर्ष पूरा भएको छ।
नयाँ संविधान लागू भएको घोषणासँगै नेपालको अन्तरिम संविधान २०६३ खारेज भएको थियो। संविधान जारी हुँदा संविधानसभाको अध्यक्षका रूपमा स्वर्गीय सुवासचन्द्र नेम्वाङ थिए।
संघीयता, धर्म निरपेक्षता, समाजवादोन्मुख संघीय लोकतान्त्रिक गणतन्त्रात्मक शासन व्यवस्थालगायतका नयाँ व्यवस्था राखिएको यो संविधान जारी हुँदा संविधानसभाको प्रक्रियामा सहभागी दलका पाँच सय ३७ जना सभासदले हस्ताक्षर गरेका थिए। ‘नेपालको संविधान, २०७२’ मा ३५ भाग ३०८ धारा र ९ अनुसूची छन् ।
संविधान दिवसको अवसरमा राष्ट्रपति, उपराष्ट्रपति, प्रधानमन्त्री, सभामुख, राष्ट्रिय सभाका अध्यक्ष लगायत विभिन्न पार्टीको सभापति, अध्यक्ष तथा नेताहरुले शुभकामना व्यक्त गरेका छन् ।
प्रतिक्रिया दिनुहोस्