रेलबाट रुस पुगे किम, पुटिनसँग भेटवार्ता गर्दै

काठमाडौँ । उत्तर कोरियाली शासक किम जोङ उन रुस पुगेका छन् । आफ्नो सशस्त्र रेलमार्फत रुससँगको सीमामा रहेको खासन स्टेसनमा पुगेको मिडिया रिपोर्टमा उल्लेख गरिएको छ ।

रुसी सरकारी समाचार एजेन्सी आरआइएले किम चढेको रेल मंगलबार बिहान खासनमा स्थानीय प्रतिनिधिलाई भेटेपछि त्यहाँबाट अगाडी बढेको उल्लेख गरेको छ । यस भ्रमणमा किमले रुसी राष्ट्रपति भ्लादमिर पुटिनसँग भेटवार्ता गर्ने बताइएपनि सो भेटवार्ता कुन ठाउमा हुन्छ भन्ने खुलाइएको छैन ।

मिडिया रिपोर्टमा किम र पुटिन रुसको भ्लादिभोस्टोक सहरको भ्रमण गर्ने बताइएको छ । कोरोनापछि किम जोङको यो पहिलो विदेश यात्रा हो । किमको यस भ्रमणमा उत्तर कोरियाले रुसलाई सैन्य सहयोग गर्ने सम्झौता हुने बताइएका कारण सबैको नजर रहेको छ । युक्रेनसँगको युद्धमा रहेको रुसलाई उत्तर कोरियाले हतियार आपूर्ति र सैन्य सहयोग गर्ने अमेरिकाले दाबि गरेको छ ।

सेप्टेम्बर १३ सम्म हुने इस्टर्न इकोनोमिक फोरममा भाग लिन दुवै नेताले भ्लादिभोस्तोकस्थित सुदूर पूर्वी संघीय विश्वविद्यालयको क्याम्पसको भ्रमण गर्ने र किमले रुसको प्रशान्त महासागर फ्लीटको नेभल बेस पियर ३३ को भ्रमण गर्न सक्ने बताइएको छ ।

किम आफ्नो परिवारको पुरानो हरियो रङको रेलबाट रुसको यो यात्रामा निस्किएका हुन् । किम हवाई यात्राबाट डराउने मानिन्छ, त्यसैले उनी धेरैजसो रेलबाट यात्रा गर्छन् । यो ट्रेन स्टालिनले किमका हजुरबुवा किम इल सुङलाई सन् १९४९ मा उपहार दिएका थिए । यो धेरै कोचहरुसंग एक आपसमा जोडिएको ट्रेन हो । किम जहिले पनि उत्तर कोरिया वा चीनको यात्रामा जान्छन्, उनको सम्पूर्ण टोली यही रेलमा साथमा आउँछन् ।

न्यूयोर्क टाइम्सका अनुसार रुसले उत्तर कोरियाबाट आर्टिलरी गोला र एन्टी-ट्याङ्क मिसाइलहरू चाहेको छ । यसको बदलामा उत्तर कोरियाले रुससँग स्याटेलाइट र आणविक पनडुब्बी प्रविधिको माग गर्ने बताइएको छ । यस बाहेक किम जोङ उन आफ्नो देशको लागि खाद्यान्न सहयोग पनि चाहन्छन् । वास्तवमा, उत्तर कोरियामा अन्नको ठूलो अभाव छ, जबकि रूस विश्वमा सबैभन्दा धेरै अन्न उब्जाउने देश मध्ये एक मानिन्छ ।

किमको रुस भ्रमणको विषय बाहिरिएपछि अमेरिकाले दुई नेताबीच हतियार बिक्री हुने विश्वास व्यक्त गर्दै यसअघि नै चेतावनी दिएको छ । रुस–युक्रेन युद्धको बीचमा अमेरिकाले रुसलाई हतियार आपूर्ति हुन नदिने प्रयास गरिरहेको छ । यसका लागि उसले रुसलाई हतियार नदिन चीन र उत्तर कोरियालाई निरन्तर दबाब दिइरहेको छ । अमेरिकी अधिकारीका अनुसार उत्तर कोरियाले रुसलाई हतियार आपूर्ति गर्ने अघिल्लो सम्झौता अमेरिकी दबाबका कारण रद्द भएको थियो ।

बीबीसीको रिपोर्ट अनुसार सन् १९९० को दशकमा उत्तर कोरियामा खतरनाक अनिकाल परेको थियो । त्यसयता त्यहाँ खाद्यान्न अभाव छ । फेब्रुअरीमा, विज्ञहरूले चेतावनी दिएका थिए कि उत्तर कोरियामा खाद्य संकट गहिरो अनाज उत्पादन कम भएको छ ।

प्रतिकूल मौसम र अन्तर्राष्ट्रिय प्रतिबन्धका कारण त्यहाँको अवस्था निरन्तर बिग्रँदै गएको छ । दक्षिण कोरियाको स्याटेलाइट तस्विरले सन् २०२२ मा उत्तर कोरियामा सन् २०२१ को तुलनामा १८ हजार टन कम अन्न उत्पादन भएको देखाएको थियो ।