बराबरीमा नै रोकियो बार्सिलोना

भिगो (एजेन्सी) । सेल्टा भिगोको घरेलु मैदानमा बार्सिलोना २–२ को बराबरीमा रोकिएको छ । लियोनल मेस्सी र लुइस स्वारेज बेन्चमा थिए भने, आन्द्रेस इनियेस्टा, इभान राकिटिक, सर्जियो बुस्केट र जेरार्ड पिके विश्राममा थिए।
बार्सिलोनालाई ३६ औं मिनेटमा औसमाने डेम्बेलेले अग्रता दिलाए पनि पहिलो हाफको अन्तिम मिनेटमा घरेलु टोलीका जोनाथन क्यास्ट्रो ओट्टो (जोनी) ले बराबरी गोल गरेका थिए ।

दोस्रो हाफमा फ्रान्सिस्को अल्कासरले ६४ औं मिनेटमा बार्सिलोनालाई पुनः अग्रता दिलाए । खेलको ७१ औं मिनेटमा सेल्टाका स्ट्राइकर आइगो आसपासलाई फाउल गरेपछि बार्सिलोनाका फुल ब्याक सर्जी रोबर्टो सोझै रातो कार्ड पाउँदै मैदानबाट बाहिरीए । १० खेलाडीमा सिमित बार्सिलोनाविरुद्ध उनै आसपासले ८२ औं मिनेटमा बराबरी गोल गरे।

खेलको ६० औं मिनेटमा फिलिप कौटिन्होको स्थानमा मैदान प्रवेश गरेका मेस्सीले सेल्टाको घरेलु मैदानमा फेरी गोल गर्न सकेनन् ।
शिर्षस्थानमा बार्सिलोनाको ३३ खेलमा ८३ अंक छ भने सेल्टा ४४ अंक सहित ८ औं स्थानमा छ।