पहिरो र बाढीले ठाउँ-ठाउँमा सडक अवरुद्ध

फाइल तस्बिर

काठमाडौं, साउन २८ ।  कोशी प्रदेशका विभिन्न स्थानमा आएको अबिरल वर्षा सँगै बाढी पहिरोका कारण विभिन्न स्थानमा सडक अबरोध भएको छ।

प्रहरीका अनुसार ताप्लेजुङको मैवाखोलामा बाढी आई मेरिङदिन गाउँपालिका–३ स्थित दोभान बजार र आठराई त्रिबेणी गाउँपालिका–५ जोड्ने मोटरेबल पुल सम्म जाने अन्दाजी ७ मिटर बाटो बाढीले बगाउँदा दुवै तर्फको सवारी आवामगन बन्द भएको छ।

यसैगरी सुनसरीको बराहक्षेत्र नगरपालिका–१ गुप्त बराह भित्री सडक खण्डमा सडकमा पहिरो झरी बाटो अबरोध भएको छ।

ईलाम नगरपालिका–४ अधिकारी चोकमा सडकमा पहिरो झरी बाटो अवरोध भएको, तेह्रथुमको छथर गाउँपालिका र सिधुवा शुक्रवारे सडकखण्डको देविथानमा सडक माथिबाट पहिरो खस्दा बाटो अवरोध भएको, ताप्लेजुङको फुङलिङ नगरपालिका–८ खोक्से खोला स्थित मेची राजमार्गमा सडक माथिबाट पहिरो खस्दा राजमार्ग अवरोध भएको छ।

ती स्थानहरुमा प्रहरी टोली खटी गई स्थानीय निकायहरूसँग समन्वय गरी बाटो खुलाउने पहल भइरहेको प्रहरीले जनाएको छ।

यसैगरी झापाको अर्जुनधारा नगरपालिका ७ खुदुवावारी–शनिश्चरे सडक खण्डमा पर्ने बिरिङ खोलाको पुलको सडकको पुलमुनीको पंखामा बाढीले क्षति पुर्‍याउँदा पुल जिर्ण अबस्थामा रहेकोले उक्त स्थानमा समेत प्रहरी टोली खटि गई स्थानीय निकायको सहयोगमा बाँध बाध्ने कार्य भइरहेको छ।