प्रधानमन्त्री पुष्पकमल दाहालद्वारा कम्युनिस्ट एकताको आह्वान

काठमाडौं, असार १७ ।  प्रधानमन्त्री पुष्पकमल दाहालले टुक्रिएर रहेका सम्पूर्ण कम्युनिस्ट पार्टीहरूलाई एकताको दिशामा अगाडि वढ्न आह्वान गरेका छन्।

नेपाल कम्युनिस्ट पार्टीका संस्थापक नेता रामविलाश जोशीको स्मृतिमा भक्तपुरको मध्यपुर थिमिमा भएको रामविलाश जोशी स्मृति प्रतिष्ठान भवन उद्घाटन तथा प्रतिमा अनावरण कार्यक्रमको आज भक्तपुरमा उद्घाटन गर्दै दाहालले समाजवादको नयाँ यात्रा तय गर्न कम्युनिस्ट पार्टीहरूको एकता आवश्यक भएको बताए।

त्यही अनुसार पछिल्लो समय आफू नेतृत्वको पार्टी नेकपा माओवादी केन्द्र, माधवकुमार नेपाल नेतृत्वको नेकपा एकीकृत समाजवादी, विप्लव र उपेन्द्र यादव नेतृत्वको कम्युनिस्ट पार्टीहरुबीच सहकार्यको दिशामा लागिरहेको उनले बताए।केपी ओली नेतृत्वको नेकपा एमालेसँगको एकता बचाउन नसक्नु दुःखद भएको उनको भनाई थियो । तथापि भएको कमजोरीबाट सिकेर नयाँ चिराबाट एकताको दिशामा अगाडि बढ्नुपर्ने आवश्यकता उनले औँल्याए।

कार्यक्रममा नेकपा एकीकृत समाजवादीका अध्यक्ष एवं पूर्व प्रधानमन्त्री माधवकुमार नेपालले नेपालमा राजनीतिक क्रान्ति सम्पन्न भइसकेको र अव जनताको जीवनमा क्रान्ति बाँकी रहेको बताए।