सन्दीपलाई आजै यूएई पठाउने तयारी गर्दै क्यान, जानुअघि वकिलसँग परामर्श

काठमाडौँ । फागुन १७ । नेपाल क्रिकेट संघ (क्यान)ले नेपाली राष्ट्रिय क्रिकेट टोलीका खेलाडी सन्दीप लामिछानेलाई आजै युएई पठाउने तयारी गरेको छ ।

आईसीसी विश्वकप लिग टूअन्तर्गत यूएईमा चलिरहेको त्रिकोणत्मक एकदीवसीय खेलअन्तर्गत बाँकी खेल खेल्न सन्दीपलाई पठाउने तयारी गरेको हो ।

यूएई, पपुवा न्युगिनी र नेपालबीचको श्रृंखलात्मक खेल खेलिरहेका एक खेलाडी घाइते भएकाले उनको ठाउँमा सन्दीपलाई पठाउने तयारी गरिरहेको क्यानले जनाएको छ ।

क्यानका अनुसार सन्दीपलाई पठाउने भिजा आइसकेको छ । सन्दीपको नाम नेपाली टोलीको अन्तिम १६ मा छ । यसअघि उनलाई विदेश जाने अनुमति अदालतले दिइसकेको छ ।

यता उनले युएई प्रस्थान गर्नुअघि आफ्ना कानुनव्यवसायिसँग परामर्श गरेका थिए। सन्दीपलाई भेटेर अदालतको आदेश र युएईमा पालना गर्नु पर्ने नियमका बारेमा जानकारी गराएको वकिल सरोज कृष्ण घिमिरेले जानकारी दिए।