कांग्रेस संसदीय दलको नेतामा गगन थापा उठ्ने, शेखर प्रस्तावक

काठमाडौँ, पुस ५ । नेपाली कांग्रेसको संसदीय दलको नेतामा संस्थापनइतर समूहबाट महामन्त्री गगन थापा नै उम्मेदवार बन्ने भएका छन् ।

बिहान बसेको बैठकले स्थापनइतर समूहबाट संसदीय दलको नेतामा महामन्त्री थापालाई उम्मेदवार बनाउने निर्णय गरेको हो ।

स्रोतकाअनुसार नेता डा. शेखर कोइराला थापाको प्रस्तावक बस्ने भएका छन् । सोमबारको छलफल टुंगोमा नपुगेपछि आज बिहान पुनः कोइराला र थापा पक्षबीच छलफल भएको थियो ।

यो सहमतिपछि अब कांग्रेसको संसदीय दलको नेतामा सभापति शेरबहादुर देउवा र महामन्त्री थापाबीच भिडन्त हुने भएको छ ।

कांग्रेस संसदीय दलको निर्वाचनका लागि आज दिउँसो २ बजेदेखि ३ बजेसम्म मनोनयन दर्ताको समय तोकिएको छ । बुधबार बिहान ८ बजेदेखि निर्वाचन हुनेछ ।