महानगरले सुकुम्बासी बस्ती हटाउन डोजर लगेपछि थापाथली तनावब्रस्त

काठमाडौं, मंसिर १२ ।  काठमाडौँ महानगरपालिकाले सुकुम्वासी बस्ती हटाउन डोजर लगेपछिपछि काठमाडौँको थापाथली क्षेत्रमा तनाव भएको छ ।

अधिकार सम्पन्न बाग्मती सभ्यता एकीकृत विकास समितिले यसअघि नै सुकुम्वासी बस्ती खाली गर्न सूचना जारी गरेको थियो । समितिलाई काठमाडौँ महानगरपालिकाले पनि साथ दिएको छ । आज सोमवार सुकुम्वासी बस्ती खाली गराउन समिति र महानगरको टोली प्रहरीसहित थापाथली पुगेपछि तनाव भएको हो । सुकुम्वासी बस्तीका बासिन्दाले थापाथली क्षेत्रमा टायर बाल्दै प्रहरीमाथि ढुङ्गामुढा गरेका छन् । बस्ती हटाउन डोजर छिरेपछि झडप भएको हो ।

झडपका कारण त्यस क्षेत्र युद्ध मैदान जस्तो भएको छ । महानगरपालिकाले बस्तीमा डोजर लगाउने खबर थाहा पाएपछि आज बिहानैदेखि बस्तीका सुकुम्बासी प्रतिकारको तयारीमा बसेका थिए । सुकुम्बासीको प्रतिकारपछि महानगरका डोजर अघि बढ्न सकेका छैनन् । महानगरपालिकाका प्रहरी समेत पछि हटेका छन् । अहिले नेपाल प्रहरीले स्थितिलाई नियन्त्रणमा लिने प्रयास गरिरहेको छ ।

काठमाडौं महानगरपालिकाले करिब ३०० नगर प्रहरी परिचालित गरी सुकुम्वासी बस्ती हटाउन लगेको हो । त्यसक्रममा स्थानीयको ढुंगा लागी करिब २५ नगर प्रहरी घाइते भएको नगर प्रहरीका एसपी राजुनाथ पाण्डेले जानकारी दिए ।

एसपी पाण्डे समेत घाइते भएका छन् । ढुंगा प्रहारबाट उनको टाउकोमा चोट लागेको छ । स्थानीयले टायर बालेर प्रदर्शन गरिरहेका छन् । स्थिति तनावग्रस्त बनेको छ । सो क्षेत्रमा सुरक्षाका लागि ठूलो संख्यामा नेपाल प्रहरी र सशस्त्र प्रहरीको टोली पनि खटाइएको छ ।