संविधान मिचिने खतरा बढेकाले गठबन्धन गर्नु परेको हो : प्रधानमन्त्री देउवा

काठमाडौं, कार्तिक ३० । प्रधानमन्त्री एवं नेपाली कांग्रेसका सभापति शेरबहादुर देउवाले मुलुकलाई समृद्ध बनाउन र संविधान रक्षाका लागि वर्तमान सत्ता गठबन्धन अझै लामो समयसम्म कायम राख्नुपर्ने आवश्यकता रहेको बताएका छन्।

बुधबार गृहजिल्ला डडेल्धुराको भागेश्वर गाउँपालिकाको बोगटामा आयोजित चुनावीसभालाई सम्बोधन गर्दै उनले यस्तो बताएका हुन् । संविधान मिचिने खतरा बढेकाले पनि गठबन्धन गर्नुपरेको उनको भनाइ रहेको छ ।

‘संविधान विपरित प्रतिनिधिसभा विघटन गरेर मुलुकलाई राजनीतिक अस्थिरतातिर धकेल्न खोजियो’, प्रधानमन्त्री देउवाले भने, ‘त्यसैले हामीले अस्थिरता अन्त्यका लागि गठबन्धन गरेर अघि बढेका हौँ।’

लामो समय मुलुकको विकास एवं समृद्धिका लागि अघि बढेकाले गठबन्धनका उम्मेदवारहरूलाई विजय गराउन सोत उनले आग्रह गरे । देउवाले गठबन्धन अहिलेको आवश्यकता भएको बताउँदै संविधानको रक्षासँगै देशलाई समृद्ध बनाउन गठबन्धन अझै लामो समयसम्म गर्नुपर्ने आवश्यक रहेको बताए ।

उनले स्थानीय सडक पूर्वाधार निर्माण, खानेपानी समस्या समाधान गर्नुका साथै बगरकोट शीर्ष रुपालसम्मको सडक कालोपत्रे गर्ने काम भइरहेको पनि बताए ।

‘अब चाँडै बगरकोट–बोकटा–गर्खा–लामीकाँडे सडक बनाउने छौँ’, उनले भने, ‘समग्र डडेल्धुराको विकासका काम अघि बढाइनेछ।’