कोरोना अपडेट– एकैदिन दुई जनाको मृत्यु, थप १५२ जनामा संक्रमण

काठमाडौ , भदौ २४ । नेपालमा कोरोना संक्रमणका कारण थप दुई जनाको मृत्यु भएको छ ।

स्वास्थ्य तथा जनसंख्या मन्त्रालयले दिएको अपडेट अनुसार आज दुई जनाको मृत्यु भएसँगै देशभर संक्रमणका कारण मृत्यु हुनेको सङ्ख्या १२ हजार १२ पुगेको छ ।

यस्तै पछिल्लो २४ घण्टामा थप १५२ जनामा कोरोना भाइरस संक्रमण पुष्टि भएको छ । देशभर ३२९४ जनामा परीक्षण गर्दा १५२ जनालाई कोरोना संक्रमण पुष्टि भएको हो ।

त्यस्तै ११८६ नमुनाको पीसीआर परीक्षण गर्दा ११० जनामा र २१०८ नमुनाको एन्टिजेन परीक्षण गर्दा ४२ जनामा कोरोना संक्रमण पुष्टि भएको मन्त्रालयले जानकारी दिएको छ ।

त्यसैगरी पछिल्लो २४ घण्टामा १३३ जना संक्रमित निको भएका छन् । योसँगै सक्रिय संक्रमितको संख्या २ हजार ४ सय ४८ पुगेको छ ।