छुट्टाछुट्टै सवारी दुर्घटनामा चार जनाको मृत्यु, पाँच जना मृत अवस्थामा फेला

काठमाडौँ, साउन १० ।  चितवन, कपिलवस्तु, सर्लाही र नवलपरासी (पश्चिम)मा भएको सवारी दुर्घटनामा चार जनाको मृत्यु भएको छ ।चितवनको भरतपुर महानगरपालिका–३ पुल्चोकस्थित सडकमा आरजे २५ जिए २९३१ नम्बरको ग्याँस बुलेटको ठक्करबाट एक जना पैदलयात्रीको मृत्यु भएको छ ।

मृत्यु हुनेमा हाल पहिचान नखुलेकी करिब ४० वर्षीया महिला रहेकी छन् । उनको सोमबार मृत्यु भएको हो ।ठक्करबाट गम्भीर घाइते भएकी उनको भरतपुर अस्पताल भरतपुरमा उपचारको क्रममा मृत्यु भएको हो । हाल फरार बुलेट चालकको प्रहरीले खोजी गरिरहेको छ ।

कपिलवस्तुको वाणगंगा नगरपालिका–३ सिउटीस्थित सडकमा लु.४२ प ७१३७ नम्बरको मोटरसाइकल सोमबार दुर्घटना हुँदा एक जनाको मृत्यु भएको छ ।मृत्यु हुनेमा मोटरसाइकलमा सवार सोही नगरपालिका–३ गंगोलिया बस्ने २२ वर्षीय विष्णु परियार रहका छन् ।

दुर्घटनामा गम्भीर घाइते भएका उनको लुम्बिनी एडभान्स सिटि जितगढीमा उपचारको क्रममा मृत्यु भएको हो । दुर्घटनामा घाइते भएका मोटरसाइकलका चालकको सोही अस्पतालमा उपचार भइरहेको छ ।

सर्लाहीको बलरा नगरपालिका–७ डुमरियास्थित सडकमा बीआर ३० डी ९५४१ नम्बरको मोटरसाइकल र बीआर ३० भी ८४९२ नम्बरको मोटरसाइकल ठोक्किँदा एक जनाको मृत्यु भएको छ ।

नवलपरासी (पश्चिम)को सुस्ता गाउँपालिका–२ सतपत्तीस्थित सडकमा लु.२२ प ३६७५ नम्बरको मोटरसाइकल मंगलबार बिहान दुर्घटना हुँदा एक जनाको मृत्यु भएको छ ।

मृत्यु हुनेमा मोटरसाइकल चालक सरावल गाउँपालिका–१ सालबास बस्ने ५३ वर्षीय ओमनाथ फौहदार रहेका छन् ।दुर्घटनामा गम्भीर घाइते भएका उनको शहिद स्मृती सामुदायिक अस्पताल चौपत्तामा उपचारको क्रममा मृत्यु भएको हो ।
पाँच जना मृत अवस्थामा फेला
बाँके, काठमाडौं, सिन्धुली र पाल्पामा पाँच जना मृत अवस्थामा फेला परेका छन् ।

बाँकेको कोहलपुर नगरपालिका–१४ पार्वतीपुर बस्ने मम्मु भन्ने २२ वर्षीय कृष्ण गडरिया र उनकै श्रीमती २१ वर्षीया अञ्जली गडरिया आफ्नै घरमा सोमबार मृत अवस्थामा फेला परेका छन् ।

जिल्ला प्रहरी कार्यालय बाँके, ईलाका प्रहरी कार्यालय कोहलपुर र अस्थायी प्रहरी चौकी हवल्दारपुरबाट खटिएको प्रहरीले घटनाका सम्बन्धमा आवश्यक अनुसन्धान गरिरहेको छ ।

काठमाडौं महानगरपालिका–२४ बसन्तपुर कालभैरव मन्दिर पछाडी हाल पहिचान नखुलेका करिब ६० वर्षीय पुरूष सोमबार मृत अवस्थामा फेला परेका छन् ।

सिन्धुलीको सुनकोशी गाउँपालिका–३ झागाझोलीस्थित बिपि राजमार्गको किनारामा हाल पहिचान नखुलेका करिब ४५ वर्षीय पुरूष मंगलबार मृत अवस्थामा फेला परेका छन् ।

पाल्पाको तिनाउ गाउँपालिका–५ तिनाउ खोलामा हाल पहिचान नखुलेकी करिब ३५ वर्षीया महिला सोमबार मृत अवस्थामा फेला परेकी छन् ।