वैज्ञानिक सोच भएका कम्युनिस्ट एक हुनैपर्छ : प्रचण्ड

काठमाडौं, असार ३० ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले वैज्ञानिक विचार भएका कम्युनिस्ट शक्ति एक हुनुपर्नेमा जोड दिएका छन्।

अल्टरनेटिभ फाउन्डेसनले बिहीबार ललितपुरमा आयोजना गरेको विज्ञान तथा सूचना–प्रविधिसम्बन्धी नीति संवाद कार्यक्रमलाई सम्बोधन गर्दै उनले अझै पनि वैज्ञानिक सोच राख्ने इमान्दार कम्युनिस्ट एक हुनाको विकल्प नरहेको बताए।

अध्यक्ष प्रचण्डले भने, ‘नेपालमा अलिक वैज्ञानिक विचार राख्ने भनेका कम्युनिस्ट नै हुन् सबै कम्युनिस्टलाई एकै ठाउँमा जम्मा गरेपछि धेरै राम्रो हुन्छ होला भनेर हिजो निकै ठूलो जोखिम र त्याग गरेर आफूले कम्युनिस्ट एकता गराएकै हो। अझै पनि वैज्ञानिक सोच राख्ने इमान्दार कम्युनिस्ट एक हुनैपर्छ त्यो मिसन हाम्रो जारी रहन्छ।’

उनले वैज्ञानिक विचार राख्नेहरु एकताका साथ अघि बढे मात्रै विज्ञान र प्रविधिको क्षेत्रमा नीतिगत सुधार गरेर विकास र समृद्धिको यात्रामा अगाडि बढ्न सकिने धारणा राखे।

अध्यक्ष प्रचण्डले विज्ञान र प्रविधिमा आम मानिसको अपरिहार्यताअनुरूप वैज्ञानिक आविष्कार हुँदै आएको छ भन्दै अहिलेको डिजिटल युगमा मानिसको उत्पादनशक्ति र उत्पादकत्व अभिवृद्धिका लागि विज्ञान र प्रविधिलाई उपयोग गरिनुपर्ने खाँचो औँल्याए।

उनले वैज्ञानिक रूपमा सामाजिक रुपान्तरण र नयाँ उत्पादन र उत्पादकत्व शक्ति बढाउन विज्ञानलाई सचेतरुपले प्रयोग गरिनुपर्ने धारणा व्यक्त गरे।

वैज्ञानिक सोचसहितको नयाँ खालको बहस नेपाली समाजलाई आवश्यक परेको भन्दै अध्यक्ष प्रचण्डले त्यसको नेतृत्व र आन्दोलनका लागि पुनः एक ठाउँमा उभिनुपर्नेमा जोड दिए।

उनले वैज्ञानिक विचारधारा, विकास र समृद्धिको यात्रामा होमिएका राजनीतिक शक्तिबीच यो छलफललाई अझ व्यवस्थित र योजनाबद्ध रुपले अभियानकै रुपमा अघि बढाउन जरुरी भएको उल्लेख गरे। रासस