नेतृत्वबाट राजीनामा दिएको हो, राजनीतिबाट होइनेः रवीन्द्र मिश्र

काठमाडौं, असार १२ । विवेकशील साझा पार्टीका सदस्य रवीन्द्र मिश्रले आफूले राजनीतिबाट नभई पार्टीको नेतृत्वबाट मात्र राजीनामा दिएको प्रष्ट पारेका छन्। आफ्नो मौनताबाट कतिपय शुभेच्छुकहरूमा राजनीतिबाटै बाहिरिन लागेको हुो कि भन्ने शंका उब्जिएको भन्दै उनले फेसबुकमा यस्तो स्टाटस लेखेका हुन्।

उनले भनेका छन्, ‘स्थानीय निर्वाचनमा पार्टीको निराशाजनक नतिजा आएपछि मैले पार्टीको नेतृत्वबाट मात्र राजीनामा दिएको हो, राजनीतिबाट होइन। पार्टीमा १६३ जना केन्द्रीय सदस्यहरू हुनुहुन्छ। पार्टी उहाँहरूले अगाडि लैजानु नै हुनेछ भन्ने विश्वास लिएको छु। म साधारण सदस्य रहने नै छु। राजनीतिको मेरो एउटैमात्र लक्ष्य भनेको यो देशको दूरगामी हित र दशकौँदेखि जसको नाममा राजनीति गरियो तर जसलाई राजनीतिले कहिल्यै स्पर्शै गरेन तिनको जीवनको रूपान्तरण हो। ती दुई लक्ष्य हासिल गर्ने प्रयासबाट म विचलित भएको छैन।

कसरी त्यो सम्भव होला भन्ने मन्थनमै छु। मन्थनबाट निस्किएको निष्कर्ष लिएर उपस्थित हुने नै छु। सबैको साथ पाए निश्चय पनि लक्ष्यमा पुग्न सहज हुनेछ। अन्यथा, यो देशको लागि जे गर्दा राम्रो हुन्छ भन्ने लाग्छ, त्यसबारे विश्वास दिलाउन प्रयास गरि नै रहनेछु।’

मिश्रले केही समयअघि विवेकशील साझा पार्टीको संयोजकबाट राजीनामा दिएका थिए।