अमेरिकी सेनाका वरिष्ठ जर्नेल भोलि नेपाल आउँदै

काठमाडौं  जेठ २५ ।   अमेरिकी सेनाका प्यासिफिक कमान्ड कमान्डिङ वरिष्ठ जर्नेल चार्ल्स ए फ्लीन बिहीबार नेपाल भ्रमणमा आउने भएका छन् । उनी चारदिने भ्रमणका लागि आउन लागेका हुन् ।

अमेरिकी सेनाका वरिष्ठ जर्नेल फ्लीनले यही जेठ २६ देखि २९ गतेसम्म नेपाल भ्रमण गर्ने तय भएको नेपाली सेनाका प्रवक्ता नारायण सिलवालले जानकारी दिए । फ्लीन अमेरिकी सेनाको विशेष विमानमार्फत काठमाडौं आउनेछन् ।

शुक्रबार उनले प्रधानसेनापति प्रभुराम शर्मासँग शिष्टाचार भेट गर्नेछन् । “यो सद्भावना भ्रमण हो । भ्रमणको अन्य तालिकाबारे अहिले जानकारी छैन,” प्रवक्ता सिलवालले भने ।

प्रधानमन्त्री शेरबहादुर देउवाको अमेरिका भ्रमण र प्रधानसेनापति शर्मा शान्ति सैनिकहरू तैनाथ रहेका मुलुक हुँदै अमेरिका भ्रमण जानुपूर्व उनको भ्रमण हुन लागेको हो ।