विश्वकप क्रिकेट छनौट प्रतियोगिता : नेपाल आठौं स्थानमा सीमित

काठमाडौं । आठौं स्थानमा रहँदै नेपालले जिम्बाब्वेमा जारी आइसीसी विश्वकप छनोट क्रिकेट प्रतियोगिता सकाएको छ । प्रतियोगिता अन्तरगत हिजो भएको सातौं स्थानको प्लेअफमा नेदरल्यान्ड्ससँग ४५ रनले पराजित भएसँगै नेपाल आठौं स्थानमा सीमित भएको हो ।

खेलमा १९० रनको विजयी लक्ष्य पछ्याएको नेपालले ४४ दशमलव ४ ओभरमा अलआउट हुँदै १४४ रनमात्र जोड्न सक्यो ।

नेपालका लागि सोमपाल कामीले सर्वाधिक ३६ रनको योगदान गरे । दीपेन्द्रसिंह ऐरीले २५ तथा कप्तान पारस खड्काले २२ रन जोडे । खेलमा टस जितेर पहिले ब्याटिङ गरेको नेदरल्यान्ड्सले निर्धारित ५० ओभरमा ९ विकेट गुमाउँदै १८९ रन बनाएको थियो ।