एकीकृत समाजवादीको अडानले गठबन्धनमा सहमति जुटेन : प्रचण्ड
काठमाडौं , बैशाख ६ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेकपा ( एकीकृत समाजवादी)को अडानले चुनावी गठबन्धनमा सहमति नजुटेको बताएका छन् ।
माओवादी केन्द्रका पूर्वस्थायी कमिटी सदस्यको बैठकमा अध्यक्ष प्रचण्डले महानगरमा सहमतिको नजिक पुगे पनि उपमहानगरमा मिल्न बाँकी नै रहेको जानकारी दिए । यता ६ महानगरमध्ये ३ कांग्रेसले लिने र ३ अन्य दलले लिनेमा सहमति भएको उनले बताए ।
काठमाडौं, ललितपुर, विराटनगर कांग्रेसलाई, भरतपुर माओवादी र वीरगन्ज जसपाले लिने सहमति भइसकेको प्रचण्डले ब्रिफिङ गरेको माओवादी नेताहरूले बताएका छन् ।
एकीकृत समाजवादीलाई पोखरा दिने सहमति भएको भए पनि तलबाट विरोध आएकोले समस्या भएको प्रचण्डले बताएका थिए । त्यसको लागि प्रयास भइरहेको पनि उनको भनाइ थियो ।
माओवादीले जितपुर, सिमरा र दाङका दुईमध्ये १ उपमहानगर पाउने प्रचण्डले जानकारी गराएका थिए । उपमहानगरमा एकीकृत समाजवादीले धेरै दाबी गरेका कारण सहमति हुन नसकेको प्रचण्डको भनाइ छ ।
एकीकृत समाजवादीलाई हेटौंडा लिन भनिएको भए पनि उसले धरान र दाङमा समेत दाबी गरेको प्रचण्डले बताएको बैठकमा सहभागी नेताहरूले बताएका छन् ।
एमालेले जितेकामध्ये कम्तीमा आधा उपमहानगर आफूलाई चाहिने एकीकृत समाजवादीको दाबी रहेको प्रचण्डले बताए ।
प्रतिक्रिया दिनुहोस्