तत्काल एमालेसँग तालमेलको सम्भावना छैन : प्रचण्ड
काठमाडौं, चैत ३ । सत्तारुढ नेकपा माओवादी केन्द्रका अध्यक्ष प्रचण्डले आसन्न स्थानीय तहको चुनावमा एमालेसँग तालमेल गर्ने अहिलेसम्म कुनै सम्भावना नदेखिएको बताएका छन्।
बिहीबार बिहान लुम्बिनी प्रदेशमा प्रेस सेन्टर नेपालले आयोजना गरेको पत्रकार सम्मेलनमा सञ्चारकर्मीको जिज्ञासामा जवाफ दिँदै उनले तत्काल एमालेसँग तालमेल वा गठबन्धनको सम्भावना नरहेको बताएका हुन्।
माओवादी केन्द्रकै नेता वर्षमान पुन ‘अनन्त’ले एमालेसँग पनि चुनावी सहकार्यको ढोका बन्द नगरेको बताएको भोलिपल्ट प्रचण्डले एमालेसँग तत्काल तालमेलको सम्भावना नरहेको बताएका हुन्।
‘तत्काल एमालेसँग गठबन्धन हुने वा तालमेल हुने सम्भावना देखिएको छैन’, प्रचण्डले भने, ‘तर देशमा गम्भीर संकट आएका बेला माओवादी केन्द्र जति तीतोमीठो भए पनि सहज निकास दिन तयार हुने पार्टी हो।’
तर अहिलेसम्मको अवस्था वर्तमान पाँच दलकै गठबन्धन नै बचाएर चुनावसम्म जाने रहेको उनले बताए। तर यो कुरा कांग्रेसको व्यवहारमा भर पर्ने प्रचण्डको भनाइ छ।
प्रतिक्रिया दिनुहोस्