अलपत्र पार्ने म्यानपावर कम्पनी र दलाललाई कारबाही हुन्छ : मन्त्री श्रेष्ठ

काठमाडौं, माघ १२ । रोजगारीका लागि धेरै नेपालीहरु विदेश जाने गरेका छन् । नेपालमा रोजगारी नहुँदा उनीहरु विदेश पलायन हुन बाध्य भएका हुन् ।

तर सोचे जस्तो भने त्यहाँँ काम नपाइदा धेरै कामदार अलपत्र पनि पर्ने गरेका छन् । यता श्रम, रोजगार तथा सामाजिक सुरक्षा मन्त्री कृष्णकुमार श्रेष्ठले रोजगारीको प्रलोभन देखाएर युवालाई अलपत्र पार्ने म्यानपावर कम्पनी र दलाललाई कानून बमोजिम कारबाही गर्ने प्रतिवद्धता जनाएका छन् ।

बुधबार संचारकर्मीसँग कुराकानी गर्दै उनले यस्तो प्रतिवद्धता जनाएका हुन् । पछिल्लो समय रोजगारीको प्रलोभन देखाएर दलालहरुले विभिन्न देशमा पु¥याई नेपाली युवाहरुलाई अलपत्र पार्ने क्रम बढेको भन्दै त्यसतर्फ सचेत रहन पनि उनले आग्रह गरेका छन् ।ठगीमा परेका नागरिकहरुले आफ्ना गुनासोहरु सिधै मन्त्रालयको सचिवालयमा फोन गरेर टिपाउन समेत उनले भनेका छन् ।

उनले दलालहरुबाट ठगिने क्रमलाई रोक्नका लागि मन्त्रालयले विभिन्न समयमा छड्के, अनुगमन, नयाँ–नयाँ गन्तव्यहरुको खोजि, श्रम सम्झौता र विभिन्न देशका कुटनीतिक नियोगसँगको भेटघाटको क्रमलाई तीव्रता दिएको पनि बताए ।

उनले दलालहरुले नेपाल सरकारले प्रतिबन्ध गरेका देशहरुमा आकर्षक रोजगारी लगाइदिने भन्दै प्रलोभन देखाएर लाखौँ रुपैयाँ ठगिरहेको भन्दै त्यसतर्फ सचेत भई यस्ता काम हुन नदिन मन्त्रालयमा सम्पर्क गरेर सहयोग गर्न आग्रह गरे ।