बढ्यो कोरोना संक्रमित: ५४० जनामा संक्रमण पुष्टि , उपत्यकामा मात्रै ३ सय १० जना
काठमाडौं, पुस २२ । देशमा पछिल्लो दिनमा कोरोना भाइरसको सङ्क्रमितको सङ्ख्यामा वृद्धि हुन थालेको छ ।
लामो समयदेखि कोरोना सङ्क्रमितको सङ्ख्या स्थिर रहेकोमा पछिल्ला केही दिनमा सङ्क्रमितको सङ्ख्यामा वृद्धि देखिएको हो । त्यसैगरि नेपालमा पछिल्लो २४ घण्टामा ५४० जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयका अनुसार देशभरका विभिन्न प्रयोगशालामा गरिएको ७ हजार २०९ जनाको पीसीआर परीक्षणमा ४७८ र ४ हजार ८९० जनाको एन्टिजेन विधिबाट गरिएको परीक्षणमा ६२ जनामा कोरोना पुष्टि भएको छ ।
पछिल्लो २४ घण्टामा १ जना कोरोना संक्रमितको मृत्यु भएको छ। सोही अवधिमा मुलुकका विभिन्न अस्पतालबाट २७१ जना कोरोना संक्रमणमुक्त भएको मन्त्रालयले जानकारी दिएको छ ।
निको हुने दर ९७ दशमलब ९ प्रतिशत रहेको मन्त्रालयले जानकारी दिएको छ । त्यस्तै थपिएका सङ्क्रमित मध्ये अधिकांश काठमाडौँ उपत्यकाका रहेका छन् । काठमाडौँ जिल्लामा मात्र पछिल्लो २४ घण्टामा २ सय २१ जना सङ्क्रमित थपिएका छन् ।
त्यस्तै, ललितपुरमा ५९ तथा भक्तपुरमा ३० जनामा सङ्क्रमण पुष्टि भएको छ । उपत्यकाबाहिर कास्कीमा १८ तथा सुनसरी जिल्लामा १६ जनामा कोरोनाभाइरसको सङ्क्रमण पुष्टि भएको हो ।
प्रतिक्रिया दिनुहोस्