रियलको दसौं जित, बार्सिलोना ओसासुनासँग बराबरीमा रोकियो

काठमाडौँ , २७ मंसिर । रियल म्याड्रिडले स्पेनी ला लिगामा आइतबार राति लगातार दसौं जित निकालेको छ ।

यसका लागि छिमेकी एटलेटिको म्याड्रिडलाई सजिलै २–० ले हरायो । बार्सिलोना भने अर्को खेलमा ओसासुनासँग २–२ को बराबरीमा रोकियो ।

रियलको जितमा करिम बेन्जेमा र मार्को एसेन्सोले एक–एक गोल गरे । डिफेन्डिङ च्याम्पियन एटलेटिकोमाथि प्राप्त यो जितपछि रियलले लिग तालिकाको शीर्ष स्थानमा आठ अंकको स्पष्ट अग्रता खोलेको छ । उसको १७ खेलबाट ४२ अंक छ भने एक खेल कम खेलेको सेभिया ३४ अंकमा छ । बार्सिलोना भने १६ खेलबाट २४ अंकमा आठौं स्थानमा रहेको छ ।