१० हजार नर्स बेलायत रोजगारीमा पठाउने सरकारको तयारी

काठमाडौं, मंसिर ३ । सरकारले बेलायत रोजगारीमा १० हजार नर्स पठाउने भएको छ । यसका लागि तयारी पनि भइरहेको बुझीएको छ ।

श्रम,रोजगार तथा सामाजिक सुरक्षा मन्त्रालयले स्टाफ नर्स पठाउने गरी समन्वय गरिरहेको जानकारी दिएको छ।

शुक्रबार बैदेशिक रोजगार पत्रकार समाजले आयोजना गरेको कार्यक्रममा बोल्दै मन्त्रालयका सचिव सूर्यप्रसाद गौतमले बेलायत सरकारले नेपालबाट नर्स लैजान चाहेकाले सम्झौताको तयारी गरिएको जानकारी दिए।

‘हामी कसरी श्रमिकमैत्री सम्झौता गर्न सकिन्छ भनेर छलफल गरिरहेका छौँ। यसमा छिट्टै नै काम हुन्छ’, सचिव गौतमले भने। श्रम मन्त्री कृष्णकुमार श्रेष्ठले पनि मन्त्रालयले नयाँ श्रम गन्तव्य खोजी गरिरहेको बताए।

‘हामी बेलायत जस्ता अरु सुरक्षित गन्तव्यको खोजी गरिरहेका छौँ। त्यस्ता मुलुकमा हामी श्रम सम्झौता गरेर श्रमिक पठाउँछौँ’, उनले भने।

सम्झौता भइसकेका मुलुकहरुको पनि पुनरावलोकन गरिने उनले जानकारी दिए ।