टी–२० विश्वकपः आज भारत भर्सेस पाकिस्तान

काठमाडौँ , ७ कात्तिक । आपसी राजनीतिक सम्बन्ध चिसिएको समय दुबईको गर्मीमा आज भारत र पाकिस्तानका क्रिकेट टिम टी–२० विश्वकपमा भिड्दैछन् ।

यो खेल नेपाली समयअनुसार साँझ ७ बजेर ४५ मिनेटमा सुरु हुनेछ । १ अर्ब ३९ लाखभन्दा धेरै जनसङ्ख्या रहेको भारत र २२ करोडभन्दा धेरै जनसङ्ख्या रहेको पाकिस्तानबीचको क्रिकेट खेल विश्वका धेरै जनसङ्ख्याले सरोकार राख्ने खेलमध्ये एक हो । त्यही कारण, यी दुवै टिमबीचका हरेक खेल महत्त्वपूर्ण मानिन्छन् । अझै, विश्वकपमा त स्वाभाविक रूपमा टिमका खेलाडीहरूमाथि जित्नुपर्ने दबाब पर्ने नै भयो ।

दुई टिमबीच पछिल्लो पटक २०१९ को एकदिवसीय विश्वकपमा समूह चरणमा भेट भएको थियो । यस खेल जित्दै भारतले विश्वकपमा पाकिस्तानविरुद्धको आफ्नो अजेय यात्रा निरन्तर जारी राख्यो ।