च्याम्पियन्स लिगमा भिल्लारियलविरुद्ध रोनाल्डोको विजयी गोल

काठमाडौँ , १४ असोज । युरोपेली च्याम्पियन्स लिग फुटबलमा भिल्लरियलविरुद्ध ईन्जुरी समयमा क्रिष्ट्रियानो रोनाल्डोले विजयी गोल गरेका छन् ।

९० प्लस ५ मिनेटमा निर्णायक गोल गर्दै रोनाल्डोले म्यानचेस्टर युनाइटेडलाई २–१ ले विजयी बनाएका हुन् । रोनाल्डोले यही खेलमार्फत च्याम्पियन्स लिगमा सबैभन्दा धेरै खेल खेल्ने खेलाडीको किर्तिमान एकलौटी बनाएका छन् ।

रोनाल्डोले च्याम्पियन्स लिगमा अहिलेसम्म १ सय ७८ खेल खेले । दोस्रो स्थानमा रहेका इकार कासियासले १ सय ७७ खेल खेलेको रेकर्ड छ । त्यस्तै, च्याम्पियन्स लिगमा ९० मिनेटपछि सर्वाधिक धेरै विजयी गोल गर्ने सर्जियो अगुइरोको किर्तिमान पनि रोनाल्डो बराबरी गरेका छन् । अगुइरो र रोनाल्डो दुबैले तीन खेलमा यसरी ९० मिनेटपछि निर्णायक गोल गरेर टोलीलाई जित दिलाएका छन् ।

खेलमा पहिले अग्रता भने भिल्लारियलले बनाएको थियो । ५३ मिनेटमा पाको अल्कासरले भिल्लरियलबाट सुरुवाती गोल गरेका थिए । त्यसको ७ मिनेटपछि एलेक्स टेल्लेसले युनाइटेडबाट बराबरी गोल फर्काए । र, इन्जुरी समयमा रोनाल्डोले विजयी गोल गरे ।