वर्षाका कारण काठमाडौँ उपत्यकामा कहाँ के कति क्षति भयो ?

काठमाडौँ, भदौ २१ । आइतबार राति परेको अविरल वर्षापछि आएको बाढीका कारण काठमाडौँ उपत्यकाका विभिन्न स्थान डुबानमा परेका छन् । डुबानमा परेका ३०१ जनालाई उद्धार गरिएको प्रहरीले जनाएको छ ।

वर्षाका कारण ठूलो भौतिक तथा मानवीय क्षति नभए पनि विभिन्न खोला छेउछाउमा रहेका बस्ती डुबानमा परेको महानगरीय प्रहरी कार्यालय रानीपोखरीले जनाएको छ । महानगरीय प्रहरी कार्यालय रानीपोखरीका सूचना अधिकारी सुशिल सिंह राठौरले वर्षाका कारण उपत्यकाका धेरै ठाउँ डुबानमा परेको बताए।

उनका अनुसार बागमती, विष्णुमति, धोबी खोला, मनहोरा खोला, शंखमुल, समाखुसी, टंकेश्वर, भक्तपुरको नरेफाँट, जोरपाटी तरकारी बजार, बल्खु तरकारी बजार लगायतका स्थान डुबानमा परेका छन् । उपत्यकाका करिब ३८५ घर डुबानमा परेको उनले जानकारी दिए ।

काठमाडौँ जिल्लाको विभिन्न स्थामा डुबानमा परेका २३२ जनालाई प्रहरीले उद्धार गरी सुरक्षित स्थानमा सारेको उनले बताए ।भक्तपुर जिल्ला ५४ जना र ललितपुर जिल्लामा बाढीमा फसेका १५ जनालाई सुरक्षित स्थानमा सारिएका उनले जानकारी दिए ।

उद्धार गरिएका धेरै जसोलाई सम्बन्धित वडा कार्यालय भवन, खुल्ला चौर लगायतका स्थानमा राखिएको उनले बताए । वर्षाका कारण खोला छेउछाउमा रहेका सुकुम्बासी बस्ती बढी प्रभावित भएको छन् ।