इङ्लिस क्रिकेटर जेम्स ब्लेकले ललितपुरबाट ईपीएल खेल्ने

काठमाडौं , भदौ ९ । इङ्लिस क्रिकेटर जेम्स ब्लेकले ललितपुरबाट ईपीएल खेल्ने भएका छन् ।
इङ्लिस व्यावसायिक क्रिकेटर अलेक्जेन्डर जेम्स ब्लेकले ललितपुर प्याट्रिओट्सबाट आगामी संस्करणको एभरेष्ट प्रिमियर लिग (ईपीएल) खेल्ने भएका हुन् ।

आगामी असोज ९ गतेदेखि २३ गतेसम्म त्रिवि क्रिकेट मैदानमा हुने प्रतियोगिताको नयाँ संस्करणका लागि साविक विजेता ललितपुरले इङ्लिस बायाँ हाते ब्याट्सम्यान ब्लेकलाई अनुबन्ध गरेको हो ।ईपीएलका प्रमुख कार्यकारी अधिकृत आमिर अख्तरले ब्लेक ईपीएलका लागि नेपाल आउने तय भइसकेको जानकारी दिए ।

असोजमा हुने ईपीएलको चौथो संस्करणमा ललितपुरसँगै काठमाडौं किङ्ग्स-११, भैरहवा ग्लाडिएटर्स, विराटनगर वारियर्स, पोखरा राइनोज, चितवन टाइगर्सले प्रतिस्पर्धा गर्नेछन् ।

पाकिस्तानी पूर्व कप्तान तथा प्रतिष्ठित क्रिकेटर शाहिद अफ्रिदी, अफगानी मोहम्मद शहजाद, श्रीलंकन दिनेश चन्डिमललगायतका खेलाडीले पनि ईपीएल खेल्ने तय भइसकेको छ ।