अफगानिस्तान उडेको युक्रेनी विमान अपहरणमा

काठमाडौं, भदौ ८ । अफगानिस्तानका लागि उडेको विमान अपहरणमा परेको छ। त्यहाँ फसेका आफ्ना नागरिकको उद्धारका लागि पठाएको विमान अपहरणमा परेको युक्रेनका उपविदेशमन्त्री यवगेनी यनिनलाई उद्धृत गर्दै जी न्युजले जनाएको छ।

हतियारधारी अज्ञात समूहले आइतबार विमान अपहरण गरी इरान पुर्‍याएको उपविदेशमन्त्री यनिनको दाबी छ। यस विषयमा उनले थप जानकारी नदिएको जी न्युजले जनाएको छ। यसैबीच काबुल विमानस्थल अहिले पनि अव्यवस्थित भीड र भागदौडका कारण अझै पनि अस्तव्यस्त रहेको बताइएको छ ।यहाँ अफगान र विदेशी नागरिकको ठूलो भीड लागेको छ ।

अफगानिस्तानको सत्तामा तालिबान आएपछि एकै पटक हजारौँ मानिसले देश छोडेर भाग्ने प्रयास गर्दा विमानस्थल वरपर ठूलो भीड लाग्ने गरेको छ । गएको हप्तादेखि काबुलको अन्तरराष्ट्रिय विमानस्थल निकै अव्यवस्थाबीच चलिरहेको बताइएको छ ।