काबुल विमानस्थलमा गोली चल्यो, ५ जनाको मृत्यु , देश छोड्नेको भिड

काठमाडौं, साउन ३२ । अफगानिस्तानको काबुल विमानस्थलमा गोली चलेको छ । गोली चल्दा कम्तीमा पाँच जनाको मृत्यु भएको छ ।

विमानस्थलमा गोली चल्दा पाँच जनाको मृत्यु भएको अन्तर्राष्ट्रिय समाचार समिति रोयटर्सले जनाएको छ । एकजना प्रत्यक्षदर्शीलाई उद्धृत गर्दै पाँचै जनाको शव लगिएको रोयटर्सले जनाएको छ ।

कस्ले गोली चलाएको हो भन्ने आधिकारिक पुष्टि भने भएको छैन । तालिबानले अफगानिस्तानको राजधानी काबूलस्थित राष्ट्रपतिको कार्यालय नियन्त्रमा लिएको दाबी गरेसँगै देश छोड्नेको विमानस्थलमा भिड लागेको छ । राष्ट्रपति अस्राफ घानीले भने हिजै देश छोडिसकेका छन् ।

हाल अमेरिकी सेनाले काबुलको विमानस्थललाई आफ्नो नियन्त्रणमा लिएको छ । मिडिया रिपोर्ट अनुसार विमानस्थलको सबै व्यावसायिक उडान रद्द गरिएको छ ।

तालिबानका एक प्रवक्ताले अफगानिस्तानमा आफ्नो नेतृत्वमा नयाँ सरकार गठन गर्ने तयारी थालिएको बीबीसीलाई बताएका छन्। देशका अधिकांश भागमा नियन्त्रण कायम गरेपछि तालिबान लडाकुहरू आइतबार राजधानी काबुल प्रवेश गरेका थिए।

उनीहरूले सोही दिन राष्ट्रपति भवनलाई पनि आफ्नो नियन्त्रणमा लिएका थिए।

तालिबान झन्डै २० वर्षपछि सत्तामा फर्किन लागेको हो।

यता काबुलका सडकहरूमा तालिबान लडाकुहरू यत्रतत्र देखिन्छन् भने सयौँ सङ्ख्यामा मानिसहरू विदेश जाने प्रयासमा विमानस्थलमा भेला भएका छन्।

तालिबान लडाकुहरू काबुल छिरेपछि ठूलो सङ्ख्यामा मानिसहरूले अन्यत्र जाने प्रयास गरेका हुन्। साठीभन्दा बढी देशले संयुक्त विज्ञप्ति जारी गरेर माहिसहरूलाई अफगानिस्तानबाहिर जान दिन तालिबानलाई आह्वान गरेका छन्।

अमेरिकी र उसका साझेदार देशहरूले काबुलबाट आफ्ना कर्मचारी अन्यत्र लग्न थालेको भए पनि रुस र चीनले भने आफ्ना दूतावास बन्द नगर्ने जनाएका छन्।