रौतहटमा दुई पक्षबीच झडप, एक जनाको मृत्यु, आठ घाइते, घर र मोटरसाइकलमा आगजनी

काठमाडौं, असार २५ रौतहटमा दुई पक्षबीच झडप भएको छ । गएराति रौतहटको चन्द्रपुरमा दुई समूहबीच झडप भएको हो ।
झडपमा आठजना घाइते भएका छन् । केही घर र आठवटा मोटरसाइकलमा आगजनी भएको छ ।

झडप देखेर स्थानीय ७० वर्षीय जगरनाथ चौधरीको हृदयाघातबाट मृत्यु भएको प्रहरीले जनाएको छ । झडपमा विनेक चौधरी, आकाश चौधरी, मुथुन कुमार चौधरी, बच्चु चौधरीलगायत घाइते भएका छन् ।

घाइतेहरुको चन्द्रनिगाहपुरस्थित अस्पतालमा उपचार भइरहेको छ ।प्रहरीको अनुसार जग्गा सम्बन्धी पुरानो विवादका कारण चन्द्रपुर नगरपालिका वडा नम्बर ८ बस्तिपुरमा गएराति १० बजे दुई पक्षबीच झडप भएको हो ।

विवादमा जगनारायण चौधरी, श्रीराम चौधरी र लक्ष्मी चौधरीको घर तोडफोड भएको छ । आठवटा मोटरसाइकलमा आगजनी भएको छ ।