सवारी दुर्घटनामा परी तीनजनाको मृत्यु

काठमाडौं, असार १३ । सुनसरीको कोशी गाउँपालिका–८, भन्टाबारीमा आइतबार बिहान भएको सवारी दुर्घटनामा परी तीनजनाको मृत्यु भएको छ ।

जिल्ला प्रहरी कार्यालय सुनसरीका अनुसार पूर्वबाट पश्चिमतर्फ जाँदै गरेको बा३ख ७२४४ नम्बरको हायस माइक्रो र अर्को दिशाबाट आउँदै गरेको बा३ख ९३६८ नम्बरको पिकअप भ्यान र स१छ ४६६१ नम्बरको मोटरसाइकलमा एकापसमा जुधेका थिए ।

घटनामा मोटसाइकल चालक सप्तरीको डाक्नेश्वरी नगरपालिका–५ का २८ वर्षीय उदय साह, मोटसाइकलमा सवार विराटनगरका ४० वर्षीय रामप्रसाद साह र पिकअप चालक विराटनगर–७ का ३८ वर्षीय अक्षयकुमार गुप्ताको मृत्यु भएको बताइएको छ ।

हायस चालक नुवाकोटको विदुर नगरपालिका–१३ का ३५ वर्षीय विवश तामाङ र सहचालक नुवाकोट–११ का २५ वर्षीय नारायण बस्याल घाइते भएका छन् । घाइतेहरुको इनरुवा अस्पतालमा उपचार भइरहेको जनाइएको छ ।